يا ترى إيه اللي جرى للعملة الأمريكية ؟ وأزاي الدولار اللي كان زعيم العملات ومسيطر على السوق .. إزاي وصل لأسوأ أداء ليه من أكتر من 52 سنة في 2025؟ وايه علاقة رسوم ترامب وقراراته باللى بيحصل ؟ وهل الاقتصاد الأمريكي نفسه بدأ يتخبط؟
في 2025.. الدولار بيمر بمأساة حقيقية.. مش مجرد نزول عادي في قيمته.. لا.. ده انهيار وصل لمستويات ما شافهاش السوق من أكتر من نص قرن.. مؤشر الدولار نزل بنسبة 4.7% في أبريل 2025.. ده أكبر انخفاض شهري من نوفمبر 2022.. يعني الدولار بيخسر أرضه قدام عملات زي اليورو والين والفرنك السويسري.. وده خلّى المستثمرين يبيعوه ويهربوا لعملات تانية أكتر أمان.
طيب إيه اللي وصل الدولار للمرحلة دي؟
أول سبب.. الحرب التجارية اللي زي النار اللي ما بتطفّاش.. الرئيس المريكي ترامب فرض رسوم جمركية على الصين.. والصين ردت بنفس القوة..و النتيجة ضبابية كاملة في الأسواق.. المستثمرين مش عارفين إذا فيه أمل في اتفاق تجاري ولا الحرب دي هتطول سنين.. وزير الخزانة سكوت بيسنت بيقول إن الصين لازم تهدّي الأول وان فيه مفاوضات لحل المشكلة .. لكن الصين بتقول إن مفيش حتى مكالمة حصلت بين ترامب والرئيس الصيني.. الارتباك ده خلّى الناس تبيع الدولار.. وتشتري الين والفرنك السويسري.. لأن الدولار ما بقاش الملاذ الآمن اللي كانوا متعودين عليه.
تاني حاجة.. الاقتصاد الأمريكي نفسه بدأ يظهر علامات ضعف.. وكتير من الخبراء قالوا إن سياسة الرسوم الجمركية الأمريكية فوضوية.. والفوضى دي بتخلّي الأسواق متوترة.. ومع توقعات ببيانات اقتصادية أمريكية ضعيفة زي تقرير الوظائف وأرقام النمو في الربع الأول.. الدولار ممكن ياخد ضربة جديدة.. لأن المستثمرين دلوقتي بيشوفوه كعملة “مخاطرة” مش ملاذ آمن زي الأول
بس مش كل الأخبار سودة.. فيه محاولات للتهدئة.. إدارة ترامب بتفكر تخفف الرسوم على السيارات.. والصين أعفت بعض المنتجات الأمريكية من رسوم جمركية بـ125%.. لكن المشكلة إن مفيش دليل قوي إن الاتفاق التجاري قرّب.. والأسواق عايزة حاجة ملموسة مش كلام في الهوا.. لو استمر الوضع كده.. الصين ممكن تستعد لحرب تجارية طويلة.. وده هيضعف الدولار أكتر
طب كل ده يهمنا إزاي في مصر؟
الدولار لسه قوي قدام الجنيه بسبب ضغوط محلية.. الطلب على الدولار زاد بسبب الاستيراد وموسم الحج.. ومع خروج استثمارات أجنبية من السوق.. الجنيه قرب من مستوى 51 جنيه للدولار.. لكن لو الدولار استمر في النزول عالميًا.. ممكن نشوف استقرار في سعر الصرف.. بس ده مش هيحصل من غير إصلاحات قوية.. زي زيادة الصادرات وتقليل الاعتماد على الاستيراد
المؤكد .. الدولار في 2025 بيعيش أزمة حقيقية.. مش بس عملة بتخسر قيمتها.. ده رمز اقتصادي كان بيمثل القوة.. والحرب التجارية والضبابية هي اللي ضربت قوته.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
