إيه حقيقة الضغوط اللي فرضها صندوق النقد الدولي على مصر عشان تصرف القرض.. وليه الصندوق طلع واتكلم دلوقتي ومعيط قال إيه عن تفاصيل القرض وسعر الدولار وايه حكاية الخطأ اللي بيوقع فيه المصريين.
طبعا كلنا عارفين إن مصر تاني أكبر زبون لصندوق النقد الدولي في العالم بعد الارجنتين.. وإن الحكومة المصرية لجأت لصندوق النقد الدولي في ظروف صعبة كانت في اسم الحاجة فيها لتمزيل خارجي وفي نفس الوقت كانت محتاجة برنامج اصلاح اقتصادي شامل وحقيقي وقابل للتنفيذ على الأرض.
وعشان نبقي عارفين صندوق النقد مش بيضرب دولة على ايدها عشان تيجي تاخد منه قروض لكن الحكومات هي اللي بتلجأ إليه عشان تحصل على برامج تمويل.. وعشان نبقي عارفين بردو صندوق النقد مش بيسلفك فلوس وخلاص وياخد قصادها فايدة لكن التمويل بيكون مشروط باتفاق فني ومالي وبرنامج زمني لتنفيذ خطوات إصلاح اقتصادية عشان الصندوق يضمن أن فلوسه رايحة في برامج اقتصادية حقيقية وهتساهم في النمو الاقتصادي والخروج من الأزمات الاقتصادية.. لكن الحقيقة في مصر سمعة الصندوق اتعرضت للتشويه من منصات كلنا عارفينها وإنه جاي يخرب الاقتصاد المصري وأن الصندوق بيسكن فيه شيطان رجيم .. لكن دا مش حقيقي دي مؤسسة تمويل دولية وبرامجها واضحة ويتقدم دعم فني ومالي ومراجعة لتنفيذ إصلاحات.
منصات الشر قالت بردو إن صندوق النقد الدولي مارس ضغوط وفرض شروط للسيطرة على الاقتصاد المصري وموارد الدولة ودا اللي نفاه الدكتور محمد معيط، المدير التنفيذي لصندوق النقد الدولي وممثل المجموعة العربية من ساعات وقال إن الصندوق مسؤول عن الاستقرار المالي في العالم وكمان الأوضاع الاقتصادية للدول وأكد إن الصندوق لم يضغط على الحكومة المصرية بسبب وضع الاقتصاد وقال إن مجلس إدارة صندوق النقد الدولي متفهم جدا للي بيحصل في منطقة الشرق الأوسط وآثاره على الاقتصاد المصري وبالتالي بيتواصل مع الحكومات المختلفة لتعديل البرامج الاقتصادية.. يعني من كلام معيط هنعرف أن مفيش ضغوط على مصر ولاشروط لكن فيه اتفاق بين مصر والصندوق بيتم خلاله تنفيذ خطوات اقتصادية بيتم مراجعتها في أوقات معينة.
طيب مصر كسبت ايه من التعامل مع صندوق النقد الدولي ؟
لو بصينا على المشهد الاقتصادي دلوقتي هنلاقي إن صندوق النقد الدولي كان ليه دور كبير في التنمية الاقتصادية اللي حصلت لأن تقاريرها عن الاقتصاد المصري هي اللي فتحت الطريق للاستثمارات الخارجية عشان تيجي مصر وهو اللي خلي وكالات التصنيف الائتماني العالمية تغير نظرتها للاقتصاد المصري ودي حاجة مهمة جدا لأن المستثمرين في العالم بيمشوا ورا تقارير الصندوق ووكالات التصنيف وبيختاروا الأسواق بناء على تقيماتهم وشفنا إزاي الاستثمارات بدأت تهل على مصر بشكل غير مسبوق بعد التقارير الدولية الإيجابية عن الاقتصاد المصري وإنه اتحول لأهم الاقتصاديات الواعدة في العالم ودا بفضل الإصلاحات المالية والتشريعية والاقتصادية اللي حصلت بالتعاون مع صندوق النقد.. ومعاناة مثلاً قرار تحرير سعر الصرف ودا اللي فتح الطريق لصفقة رأس الحكمة وبعدها الصفقات الضخمة التانية.
ونرجع لكلام الدكتور معيط لانه قال حاجة مهمة جدا هي وإن مفيش حاجه اسمها السعر العدل للدولار وقال إن دي كلمو بنرددها في مصر بس ومش بتتقال في أي دولة تانية في العالم ومحدش عارف المصريين جابوا المصطلح دا منين.. ودا لأن سعر الدولار بيتحدد حسب عوامل كتير وحسب العرض والطلب وسعره العادل هو اللي بيحدده السوق كل يوم حسب قانون العرض والطلب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
