انفراجة مهمة في الأزمة تهديء جنون الدهب.. ايه اللى هيحصل فى سويسرا بين أمريكا والصين؟ - غاية التعليمية
غاية التعليمية يكتُب.. إيه اللي ممكن يهدّي جنون الدهب اللي مالي الأسواق؟ .. وليه الدولار بيترنح وسعره بيتراجع كل يوم ؟ وإزاي محادثات في سويسرا ممكن تغيّر قواعد اللعبة التجارية في العالم كله؟ و إيه اللي بيحصل بين أمريكا والصين .. وازاي المفاوضات دي ممكن تكون نقطة تحول في الاقتصاد العالمي.
النهاردة الأسواق كلها عينها على سويسرا ..عشان من 9 لـ 12 مايو 2025 .. هيحصل لقاء قمة بين وزير الخزانة الأمريكي سكوت بيسنت .. ونائب رئيس الوزراء الصيني هي ليفينغ .. المحادثات دي مش مجرد كلام في الهوا .. دي جولة مفاوضات تجارية بين أكبر اقتصادين في العالم .. أمريكا والصين .. اللي بيحاولوا يلاقوا حل للحرب التجارية اللي نازلة ضرب في الأسواق من شهور
طب إيه القصة؟
الشهر اللى فات أمريكا ضربت الصين برسوم جمركية 145% على كتير من الواردات .. الصين ما سكتتش .. ردت برسوم 125% على البضايع الأمريكية .. النتيجة؟ .. أسعار الدهب طارت في السما عشان المستثمرين بيهربوا للملاذ الآمن .. الدولار بيخسر قوته قدام العملات التانية .. والتجارة العالمية بقت زي السفينة في عاصفة .. كل ده بسبب التوتر بين واشنطن وبكين .. بس النهاردة في أمل
المحادثات في سويسرا جاية في وقت مثالي .. أمريكا بتقول إنها عايزة توازن النظام الاقتصادي العالمي .. يعني عايزة تخفف الضغط على المستهلكين والصناعات اللي عندها .. الصين من ناحيتها بتقول إنها مش هتتنازل عن مبادئها .. بس مستعدة تتفاوض لو أمريكا بطلت “تلوي دراعها” بالرسوم الجمركية .. الخبر المهم إن الصين وافقت على المحادثات بعد ضغط من الصناعات والمستهلكين الأمريكيين .. يعني الضرر وصل للطرفين.
طب هيحصل إيه لو المحادثات نجحت؟
لو المحادثات نجحت .. في احتمالات إيجابية .. أولاً .. أسعار الدهب اللي وصلت قبل كده ل 3500 دولار للأونصة ممكن تنزل لو التوتر بين البلدين خف .. ثانياً .. الدولار اللي نزل تحت 99.1 نقطة في مؤشر الدولار ممكن يقوى لو الرسوم الجمركية اتخففت .. ثالثاً .. التجارة العالمية هترجع لطبيعتها تدريجياً .. لأن الرسوم دي كانت بتعطل سلاسل التوريد وبتزود أسعار السلع.
لكن محدش بيتوقع إن المحادثات هتوصل لاتفاق كبير .. سكوت بيسنت قال إن الهدف هو تقليل التوتر .. يعني لو حصل تقدم بسيط .. زي تخفيف الرسوم على بعض المنتجات زي المنسوجات أو المعدات الطبية .. ده ممكن يهدي الأسواق ويرجع الثقة في التجارة العالمية .. لكن لو المحادثات ما نجحتش .. الأسواق ممكن تشوف تقلبات أكتر .. الدهب هيفضل يرتفع .. والدولار هيواجه ضغوط أقوى.
يعني من الآخر المحادثات في سويسرا هتبقى اختبار حقيقي لقدرة أمريكا والصين على إيجاد حلول وسط .. لو نجحوا .. الأسواق هتهدى والتجارة العالمية هتستفيد .. لو فشلوا .. التأثير هيبقى سلبي على الدهب والدولار والاقتصاد العالمي.
كُنا قد تحدثنا في خبر انفراجة مهمة في الأزمة تهديء جنون الدهب.. ايه اللى هيحصل فى سويسرا بين أمريكا والصين؟ - غاية التعليمية بأستفاضة، ويمكنك تصفح جميع الأخبار المتعلقة بهذا الشأن عبر موقعنا غاية التعليمية الالكتروني.
