يا ترى إيه سر ارتفاع تحويلات المصريين في الخارج خلال الفترة الأخيرة، هل في محفزات جديدة من الحكومة والقطاع المصرفي شجعتهم على زيادة تدفقاتهم، ولا مرونة سعر الصرف السبب، ولا في أسباب تانية خالص، والأرقام الكبيرة دي بتدل على إيه؟
في الشهور الأخيرة، ارتفعت تحويلات المصريين العاملين بالخارج وحققت أرقام غير مسبوقة، وتحديدا خلال النصف الأول من العام المالي الحالي، يعني من يوليو لحد ديسمبر.
ونسبة الزيادة في التحويلات كانت 80.7% على أساس سنوي، بمقدار 17.1 مليار دولار مقابل نحو 9.4 مليار دولار بنفس الفترة من السنة اللي فات، وده سبب كبير عشان يزود الاحتياطي النقدي الأجنبي بتاعنا لـ 48.144 مليار دولار خلال شهر أبريل اللي فات، وفقا لإحصائيات البنك المركزي، ودع مؤشر هايل بيدل على نجاح السياسة النقدية اللي اتبعها البنك المركزي من ساعة ما أخد قرار تحرير سعر الصرف في مارس 2024 .
ونقدر نقول ونأكد كمان إن نجاح السياسة النقدية للبنك المركزي من وقت قرار تحرير سعر الصرف، أدت للقضاء على السوق الموازي أو السوق السودا للعملة، وده ساهم في وجود سعر واحد للعملة الأجنبية أو الدولار، واستقرار سعر الصرف خلال 14 شهر فات، وطبعا ده انعكس بشكل إيجابي وزود ثقة المصريين العاملين بالخارج في الجهاز المصرفي المصرفي، عشان كده متوقع إن التحويلات دي تزيد بنسبة كبيرة خلال السنة دي 2025، خاصة مع استدامة استقرار سعر الصرف لفترة طويلة منذ، لأن بتراوح سعر صرف الدولار ما بين 47 جنيه حتى 51 جنيه.
كمان، زيادة التحويلات ساهمت في زيادة التنازل عن الدولار للمصارف الرسمية، عشان المصريين بالخارج يقدروا يستفيدوا من سعر الفايدة المرتفع بالبنوك، بجانب إقبالهم على شراء أراضي وعقارات بالعملة الأجنبية.
ودلوقتي التوقعات بتقول إن تحويلات المصريين في الخارج، هتفضل مستمرة في الزيادة خلال العام الحالي، خاصة وأنها بتعتبر أهم ثاني مصدر من مصادر دخل مصر من النقد الأجنبي، ولها دور كبير جدا في زيادة الاحتياطي النقدي الأجنبي المصري والاستقرار الاقتصادي وتعويض العجز التجاري للبلاد.
عشان كده، التحويلات دي ساهمت في زيادة الاحتياطي النقدي الأجنبي واللي بلغ 48.144 مليار دولار في أبريل الماضي.
عندك كمان، إيرادات مصر من النقد الأجنبي في زيادة مستمرة، يعني مثلا إيرادات السياحة سجلت 8.7 مليار دولار خلال النصف الأول من العام الحالي مقابل نحو 7.8 مليار دولار.
وبرضو الاستثمار الأجنبي المباشر، سجل صافي تدفقات داخلة بحوالي 6 مليار دولار من 5.5 مليار دولار في السنة اللي فاتت، والكلام ده معناه إن زيادة إيرادات مصر من النقد الأجنبي بيساهم في استقرار سعر صرف العملة الأجنبية نتيجة زيادة حجم المعروض من النقد الأجنبي.
ضيف على كل ده، إن تسهيل التحويلات المالية للمصريين بالخارج من خلال تطبيق "إنستا باي" في بعض الدول المحيطة، سهل عملية التحويلات المالية لهم، وده بجانب قرار البنك المركزي بإصدار التراخيص لعدد من البنوك المصرية لتفعيل خدمة استقبال الحوالات المالية من الخارج وإضافتها فورا لحسابات العملاء عبر "انستا باي".
وفي النهاية، نقدر نقول إن في حالة استمرار تدفقات تحويلات المصريين العاملين بالخارج بالمعدل ده، مصر هتقضي على أزمة الدولار في فترة قصيرة جدا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
