انتقد الإعلامي مصطفى بكري مشروع قانون الإيجار القديم الذي قدمته الحكومة لمجلس النواب مشيرا إلى أنه وضع الجميع في أزمة.
وقال بكري خلال برنامج "حقائق وأسرار" المذاع على قناة "صدى البلد": "امتى نتعلم من الدروس مين المستشار اللي وضع القانون ده بشكله الحالي وورط الكل في الأزمة مع احترامي دا شخص لا يرى أحكام دستورية ولا عنده البعد الاجتماعي ولا هو حريص على أمن البلد".
وأضاف: "بلدنا تستحق كوادر حقيقة ناس عندها بعد سياسي وناس عندها وعي وناس تكون حاسة بالناس وعارفة مشاكلها وتكون دارسه كل خطوة ممكن تؤدي لفين ولكن التعامل من الأبراج العاجية وأن الناس دي خلال نقدر نمشي عليها أي حاجة خلاص انسوا".
وتابع: "الشعب دا واعي وعميق وعارف كويس أوي وخد دروس وعظات وعبر، مفيش داعي نتكلم عن اللي فات احنا بنبص لقدم احنا يا جماعة في ظروف صعبة والريس بيجري هنا وهناك النهاردة في موسكو وامبارح في اليونان وقبله في قطر والإمارات عشان يجيب استثمارات ويكمل مشروع بناء الدولة العصرية الحديثة".
وأكمل: "البعض مش عايز يسيبنا في حالنا كل واحد ماسك معول وبيحاول يهد في البلد تشكيك ملوش حدود أكاذيب وشائعات وأخطاء في صناعة القرار والكلام ده كله لازم يتحط له حد، يجيلك وزير يضرب القطاع العام ويقولك مصيبة مصر في القطاع العام".
وأوضح: "شركة الدلتا للأسمدة لما قرروا تفكيكها والإنهاء عليها أحد الوزراء عرض الأمر على السيد الرئيس ووضحت الصورة الحقيقة والرئيس كان قراره بلاش تفككوها، مصنع الحديد والصلب في حلوان أصروا يخلصوا عليه وصوتنا اتنبح وادى المصنع بيتباع خردة وهو ثروة قومية".
وذكر: "التراب بتاع المصنع اللي هو في الواحات مقدر بقيمة 20 مليار دولار سيبك عن آلاف الأفدنة والمكن والأفران وغيره".
