يا ترى إيه اللي ممكن يحصل لو اتنين من أكبر قوى اقتصادية في العالم قرروا يتحدوا ويشتغلوا مع بعض بشكل أقوى؟ .. تخيلوا روسيا والصين يمسكوا إيد بعض ويقولوا للعالم: "إحنا هنا وهنغير قواعد اللعبة" .. ده هيأثر إزاي على الاقتصاد العالمي؟ .. وإيه علاقة دونالد ترامب بالموضوع ده؟ .. والدولار الأمريكي.
روسيا والصين مش بيجمعوا بينهم بس مصالح اقتصادية .. دول بيحاولوا يبنوا تحالف قوي يقلب موازين القوى في العالم .. ومن ساعات الرئيس الصيني شي جين بينغ زار موسكو واتقابل مع الرئيس الروسي فلاديمير بوتين.. الاتنين أكدوا إن العلاقة بينهم "شراكة استراتيجية" .. يعني إيه؟ .. يعني دول بيشتغلوا مع بعض في كل حاجة: تجارة .. طاقة .. حتى سياسة خارجية .. بوتين قال إن التعاون ده في مصلحة شعوبهم ومش موجه ضد حد .. بس الحقيقة إن الخطوة دي بتقلق أمريكا والغرب عموما.
خلونا نركز على الاقتصاد .. روسيا والصين وصلوا لمستوى تبادل تجاري غير مسبوق .. في 2024، حجم التجارة بينهم وصل 245 مليار دولار .. ده رقم قياسي وبيزيد بنسبة 68% عن 2021 .. الصين بقت أكبر مستورد للنفط والغاز من روسيا، خصوصًا بعد ما العقوبات الغربية ضربت روسيا بسبب حرب أوكرانيا .. الصين بتشتري النفط والغاز الروسي بكميات ضخمة، وده ساعد روسيا تبقى في المشهد الاقتصادي رغم الحصار الغربي .. مش بس كده، دول بيحاولوا يقللوا اعتمادهم على الدولار .. تخيلوا إن أكتر من 90% من معاملاتهم بقت باليوان والروبل .. يعني بيحاولوا يضربوا هيمنة الدولار في التجارة العالمية.
وده هيأثر إزاي على الاقتصاد العالمي؟
لما روسيا والصين يقووا تعاونهم، ده بيخلّي دول تانية زي الهند والبرازيل ودول إفريقيا تفكر تعمل زيهم .. يعني ممكن نشوف نظام اقتصادي جديد يعتمد أقل على الدولار والمؤسسات المالية الغربية زي البنك الدولي وصندوق النقد .. مجموعة "بريكس" اللي بتقودها روسيا والصين بتحاول تبني نظام عالمي جديد متعدد الأقطاب .. ده معناه إن الدول هتبقى أقل اعتمادًا على أمريكا، وده بيقلل النفوذ الاقتصادي والسياسي للغرب.
نيجي بقى لترمب .. الراجل ده من ساعة ما رجع الرئاسة في 2025 حاطط الصين في دماغه .. ترمب فرض رسوم جمركية قاسية على المنتجات الصينية، وده خلّى العلاقات مع الصين متوترة أكتر .. الصين ردت وقالت إنها هتدافع عن مصالحها بكل قوة .. يعني ممكن نشوف حرب تجارية أقوى بين أمريكا والصين .. ترمب شايف إن التعاون الروسي الصيني تحدي مباشر لأمريكا .. عشان كده بيزود الضغط على الصين، سواء بالرسوم الجمركية أو بدعم تايوان، اللي الصين بتعتبرها خط أحمر.
أما بالنسبة للدولار .. فهو لسه قوي بس فيه تحديات جديدة .. لما روسيا والصين بيستخدموا عملاتهم المحلية في التجارة، ده بيقلل الطلب على الدولار .. لو دول تانية زي دول "بريكس" مشيت على نفس الطريق، ممكن على المدى الطويل قوة الدولار تتأثر .. بس خلونا نكون واضحين، الدولار مش هيخسر مكانته بين يوم وليلة .. لسه هو العملة الرئيسية في التجارة العالمية، بس الخطوات دي زي إشارة تحذير إن العالم بيتغير.
المؤكد فى القصة دي ان التحالف الروسي الصيني ده زي رسالة للعالم: إحنا بنغير قواعد اللعبة .. الاقتصاد العالمي ممكن يشوف تحولات كبيرة لو النظام الجديد ده نجح .. ترمب هيحاول يحافظ على هيمنة أمريكا، بس التحدي قدامو مش سهل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
