يا ترى إيه اللي ممكن يخلّي 2025 عام الجنيه المصري؟ و ليه التوقعات بتقول إن الدولار هينزل أكتر؟ وإزاي مصر بتتحرك بسرعة صاروخ عشان تقضّي على أزمة نقص الدولار؟
أغلب التوقعات بتقول إن الجنيه المصري هيكون نجم الساحة في 2025 .. والدولار اللي كان بيسيطر .. بدأ يتراجع .. طب ليه؟ .. عشان مصر بتستقبل تدفقات دولارية ضخمة من كل حتة .. من السياحة .. من تحويلات المصريين في الخارج .. من الاستثمارات الأجنبية .. وحتى من الصادرات اللي بتزيد يوم بعد يوم .. وفوق ده كله .. فيه دولة عربية كبيرة أعلنت إنها هتحوّل ودائعها بالدولار في البنك المركزي المصري إلى استثمارات مباشرة .. يعني فلوس شغالة مش نايمة.
حد ممكن يسأل ويقول يعنى ايه تدفقات دولارية؟
التدفقات الدولارية هي فلوس كتير جدًا بتدخل مصر بالعملة الصعبة .. السياح رجعوا بقوة .. في الربع الأول من 2025 .. إيرادات السياحة قفزت لـ6.6 مليار دولار .. وتوقعات "فيتش سوليوشنز" بتقول إن الرقم ده هيوصل 17.4 مليار دولار بنهاية السنة .. مش بس كده .. تحويلات المصريين اللي بيشتغلوا بره زادت بنسبة 36% في أول عشر شهور من 2024 .. ووصلت 18.1 مليار دولار .. وفي يوليو 2024 لوحده .. التحويلات قفزت من 1.6 مليار لـ3 مليار دولار .. يعني المصريين فى الخارج ثقتهم رجعت تاني بالقطاع المصرفي.
ومش بس السياحة والتحويلات .. الصادرات المصرية زي الغاز الطبيعي والأسمدة بتكسر الدنيا .. التضخم العالمي خلّى أسعار السلع دي ترتفع .. فمصر استفادت وزادت صادراتها .. وده بيجيب دولارات أكتر للبلد .. وكمان صفقة رأس الحكمة اللي جابت 35 مليار دولار .. وصفقات تانية زي رأس بناس اللي ممكن تجيب 41 مليار دولار .. بتخلّي المستثمرين الأجانب يبصوا لمصر بعين تانية .. حتى الدولة العربية اللي قررت تحول ودائعها لاستثمارات .. دي رسالة للعالم إن مصر بقت وجهة استثمارية قوية.
طب كل ده هيأثر إزاي على أزمة نقص الدولار؟
ببساطة .. لما الدولار يبقى موجود بكترة في السوق .. الطلب عليه بيقل .. وسعره بينزل قصاد الجنيه .. يعني الجنيه هيقوى .. وده اللي بدأ يحصل فعلًا .. في أبريل 2025 .. سعر الدولار وصل 49.6 جنيه حسب توقعات صندوق النقد الدولي .. وده أقل من توقعاتهم اللي كانت 50.6 جنيه .. وفيه محللين زي اللي في "غولدمان ساكس" بيقولوا إن الجنيه ممكن يرتفع أكتر في أول 2025 لو التدفقات استمرت بالقوة دي
لكن خلينا نتكلم بصراحة .. مش كل حاجة وردي .. مصر لسه قدامها تحديات .. خدمة الدين الخارجي في 2025 هتكلف حوالي 22.4 مليار دولار .. وده ضغط كبير .. لكن مع زيادة الاحتياطي النقدي اللي وصل 47 مليار دولار .. وقرب يوصل 50 مليار .. مصر بقت أقوى في مواجهة الضغوط دي .. والبنك المركزي بيشتغل على سياسات ذكية زي تحرير سعر الصرف من مارس 2024 .. اللي خلّى السوق أكتر استقرارًا وقلّل من السوق السوداء.
عشان كده 2025 ممكن يكون نقطة تحول للاقتصاد المصري .. الجنيه بيستعد يرجع لعرشه .. والدولار بيتراجع قدام قوة التدفقات الدولارية .. السياحة بتزدهر .. الصادرات بتكبر .. الاستثمارات بتدخل من كل حتة .. وتحويلات المصريين في الخارج بتدّي دفعة قوية .. لو استمرينا على الطريق ده .. أزمة نقص الدولار هتبقى ذكرى من الماضي .. خلّيك متفائل .. مصر راجعة وبقوة .. و2025 هيبقى عام الجنيه المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
){kind=link}