إزاي مصر بتزاحم الدول الكبيرة في احتياطيات وإنتاج الذهب في افريقيا.. والأرقام بتقول مصر رايحة على فين في احتياطي المعدن الأصفر.. وليه مصر بتخزن الذهب.
مصر أول دولة في العالم تكتشف الدهب وكمان تعيد تصنيعه ولسه مناجم الفراعنة موجودة زي ما هي.. وعشان كده الدهب عند المصريين كان ليه وضع ومكانة خاصة.. واهمية الدهب في الاقتصاديات العالمية دلوقتي جاية من إنه ملاذ آمن ضد الصدمات والتقلبات الاقتصادية والحقيقة مصر بدأت تتقدم بشكل قوي في مجال الدهب كمكون اقتصادي استراتيجي خاصة في ظل التحديات العالمية الحالية وقرارات ترامب الجنونية.
والحقيقة كمان إن احتياطي مصر من الدهب بيزيد بشكل مستمر وقدرت مصر تحجز مكان بين كبار حائزي الدهب في قارة أفريقيا وفي آخر بيانات رسمية كشف البنك المركزي المصري عن ارتفاع قيمة الدهب المدرج داخل الاحتياطي النقدي الأجنبي لمصر إلى 12.61 مليار دولار، بنهاية مارس 2025، مقابل 11.851 مليار دولار بنهاية فبراير 2025.
ونفس الأرقام قالت إن الاحتياطي من الدهب قفز بنسبة 221% في 6 سنين بس بخلاف زيادة القدرة الإنتاجية ليصل إلى 800 ألف أونصة سنويا بحلول 2030..
والنهاردة مصر بتعتبر من أكبر الدول الأفريقية في امتلاك احتياطيات الدهب وعشان نبقي عارفين اي زيادة في احتياطي الدهب معناه تعزيز الاستقرار المالي والاقتصادي بجانب ترسيخ مكانة مصر في النظام المالي العالمي لأن الدهب هنا بيعتبر زي النقد تماما يعني بيعتبر زيه زي الدولار في البنوك المركزية.
وحسل بيانات مجلس الذهب العالمي مصر اشترت في سنة 2022 كمية ضخمة من الدهب وصلت إلى 47 طن وتم إضافة 44 طن للاحتياطي في فبراير دفعة واحدة من نفس السنة وشراء 64 كيلو تقريبا في مرحلة لاحقة ليسجل احتياطي الذهب في مصر 125.55 طن قبل ما يزيد لحوالي 127 طن النهاردة في البنك المركزي المصري وبكده مصر بتحتل المركز التالت افريقيا من حيث حجم الاحتياطي ورغم الترتيب دا مصر احتلت مرتبة متقدمة بين الدول الأكثر نموا في زيادة الاحتياطي من الذهب.
طيب ليه مصر بتخزن الدهب بعد استقرار الوضع الاقتصادي ؟
عشان نبقى عارفين زيادة الاحتياطي الذهبى مش بيعتبر بس وسيلة للتحوط ضد الأزمات العالمية لكن بيعتبر في نفس الوقت أداة فعالة لدعم استقرار السياسات النقدية وتحقيق التنمية الاقتصادية والأمان المالي.. زي شخص معاه فلوس في جيبه لكن مطمن إنه معاه رصيد معقول في البنك يقدر يلجأ إليه لو حصل له أي طارئ..
اخر الإحصائيات والتوقعات بنقول إن مصر في طريقها لتصبح واحدة من أكبر الحائزين للدهب في إفريقيا ودا طبعا هيعزز ثقة المؤسسات الدولية في الاقتصاد المصري ويوفر لها مزيد من الاستقلال المالي والاقتصادي ويجذب المزيد من الاستثمارات.. وخاصة إن الدولة بتجري بشكل كبير في ملف التنقيب عن الدهب في مناطق جديدة وطرحت مناطق كتير أمام الشركات العالمية وفي نفس الوقت بتحاول تطور المناجم القديمة وتعيد تنميتها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
